Tag Archives: Bargad

Daro Us waqt Say

Daro Us waqt Say
Ae Shayaro,Ae Nagma Khwano, Ae Sanam Saazo
Achanak Jab Tumhari Simt
Kuch Sadioun Puranay Sheesh Mehloun Say
Sana San Teer Barsain Gay
Bohat Chil’lao Gay Tum
Aur Pukaro Gay Bohat Ba’zouq Dunya Ko
Magar Ba’zauq Dunya Ka Har Ek Baashinda
Pehlay Hi Say Ghayal Ho Chuka Ho Ga
Jo Baqi Loag Houn Gay
Woh Tumhara Saath kab Dain Gay
Kah Woh To Rajj’aatoun Ki Heeroin Peenay K Aadi Ho Chukay Houn Gay
Unhain To Sirf Woh Baatain Bhali Maaloom Houn Gi
Jahalat Ka Andhera Aur Bhi in Ragoun Main Jin Say Bhar Jaye
Woh Baatain—–
Aql-o-istadlaal Ka Ek Shaaiba Jin Main Nahein Hota
Yeh Maana Tum Bohat Samjhao Gay Unko
Magar Koi Nah Samjhay Ga
Aur is Doar-e-Sayahi Main
Jo Barpa Karbala Ho Gi
Wahan Koi Bhi Hurr Paida Nahein Hoga Tumhari Paas dari Ko
Milain Gay Sab Tumharay Khoon k Payasay
Daro Us Waqt Say
Ae Shayaro,Ae Nagma Khwano, Ae Sanam Saazo
Jo Mumkin Ho To Barh Kar Rok Lo
Us Aanay Walay Waqt Ka Rasta

اردو میں پڑھیں 

Sehraoun Main Ek Chaoun

Sehraoun Main Ek Chaoun Si Bikhrati Rahay Gi
Rutt Koi Bhi Ho,Zulf Woh Lehrati Rahay Gi

Tum Cheen To Lo Gay Mere Saawan Ki Ghatain
Awaaz Pappihay Ki Magar Aati Rahay Gi
*Pappihay = Koyl Ki Tarah Ka Parindah Magar Us Say Chota

Jaata Raha Khwaboun Main Khalal Daalnay Waala
Ab Din Main Bhi aksar Tumhain Neend Aati Rahay Gi

Bakhshay Gi Nah Usko Koi Sooraj Ki Adaalat
Yeh Raat Sitaroun Ki Qasam Khaati Rahay Gi

Kuch Zabt Nah Kar Paayen Gay Ushaaq Bhi Tere
Kuch Soort-e-Haalaat Bhi Jazbaati Rahay Gi

Sehra Ko Nah Choaray Ga Kabhi Shehar Ki Khaatir
Dunya Tere Deewanay Ko Samjhati Rahay Gi

Tujh Per Bhi Qateel Aan Pari Jab Koi Uftaad
Sab Zinda Dili Yaar Teri Jaati Rahay Gi

اردو میں پڑھیں

Bay’Zauq Thi Ya Husn Say Aagaah Thi Pehlay

Bay’Zauq Thi Ya Husn Say Aagaah Thi Pehlay
Kaisi Teri Dunya Mere Allah Thi Pehlay

Main Nay To Suna Hay Kah Yeh Dunya Teri Ya Rab!
Shayar K Khyaloun Ki Guzar’gah Thi Pehlay

Karnay Ko Hay insaan Khalaoun Ko Bhi Abaad
Jo Aaj Haqeeqat Hay Woh Afwaah Thi Pehlay

Ab Waaiz-o-Naasih Jahan Kartay Hain ibaadat
Kehtay Hain Woh Ek Rind Ki Dargah Thi Pehlay

Cheena Hay Mera Jaam Un Aankhoun Nay,Wagarna
Is Cheez Say Bachnay Ki Kahan Rah Thi Pehlay

Tha Rashk Raqeeboun Ko Mere Husn-e-Nazar Per
Ek Husn Ki Daivi Mere Hamrah Thi Pehlay

Nazdeek Say Daikha Hay Qateel Ab K Ghar Apna
Jannat Ki Mere Dil Main Bohat Chah Thi Pehlay

اردو میں پڑھیں

Ek Baar Jo Tak Lay Usay

Ek Baar Jo Tak Lay Usay Takta Hi Chala Jaye
Shola Sa Badan Uska Dehakta Hi Chala Jaye

Kardaar Ada Jab Main Karoun Baad-e-Saba Ka
Woh Phool Ki Maanind Mehakta Hi Chala Jaye

Haalaat Ki Bijli Nay Kiya Raakh Nasheman
Par Aas Ka Panchi Kah Chehakta Hi Chala Jaye

Aa Jayen Muyassar Jisay Aankhoun K Woh Saaghar
Woh Rind To Pii Pii K Behakta Hi Chala Jaye

Phooloun Ki Tawaqa Hay Nah Imkaan Samar Ka
Ek Pair Magar Phir Bhi Lehakta Hi Chala Jaye

Ham Laakh Muhazzab Houn Magar Tum Hi Batao
Jab Zabt Ka Paimana Chalakta Hi Chala Jaye

Har Gaam Pah Ilzaam Ab Bhi Hain Lakin
Un Paaoun Main Bichwa Jo Chanakta Hi Chala Jaye

اردو میں پڑھیں

Silsila Khyaloun Ka

Silsila Khyaloun Ka

Jin K Tinkay Tak Mujh Ko Pehchantay Hain
Yaad Mujhay Woh Teri Galiyaan Aaj Bhi Hain
Jin Ko Haasil Raha Sadaa Ratjaga Koi
Mere Zehan Main Woh Rang Ralliyan Aaj Bhi Hain
Aaj Bhi Main Sochoun To Aisa lagta Hay
Hont Tere Misri Ki Daliyaan Aaj Bhi Hain

Jab Main Beetay Waqt Ki Baatain Karta Houn
Kuch Murjhaye Phool Mehaknay lagtay Hain
Kahoun Tere Pas Manzar Main Jab Koi Ghazal
Bohat Puranay Jaam Khanak’nay Lagtay Hain
Ab Bhi Ginta Houn Jab Naam Raqeeboun K
Log Mujhay Hairat Say Taknay Lagtay Hain

Choomta Houn Main Un Pairoun Ko Sapnoun Main
Jin Pairoun Main Roshnioun Ki Jhanjhan Hay
Raat Ko Aksar Aankhain Dhaamp K Sota Houn
Jagmag Jagmag Youn Bhi Mera Tan Man Hay
Kaya Laina Mujh Ko in Chaand Sitaroun Say
Mere Andar To Ek Sooraj Roshan Hay

Bharkati Hay Jis Ko Yaad Jawani Ki
Dair Talak Woh Shola Sard Nahein Hota
Mosam Kaisa Bhi Ho Khoon Chehakta Hay
Umer Koi Ho Chehra Zard Nahein Hota
Yaad Nah Rakhay Jo iqraar Wafaoun K
Woh Sab Kuch Hota Hay Mard Nahein Hota

Umer K Jis Rastay Par Main Nay Paoun Dharay
Mere Jism K Saath Chala Hay Jism Tera
Pakray Raha Main Waqt Ki Ungli Jahan Talak
Pal pal Mujh Par Chaya Raha Talism Tera
Rasta Rokain Jab Halaat K Andhyaray
Roshniyan Daita Hay Mujh Ko ism Tera

اردو میں پڑھیں

Lay Gaya Apni Sab Reekh’aen Apnay Saath

Lay Gaya Apni Sab Reekh’aen Apnay Saath
Darwazay par Dastak Dainay Wala Haath

Aap Smbhal Jaye Ga Thokar Khaanay Per
Dil Ko Main Samjhaoun Meri Kaya Oqat

Yaad Nah Woh Aaye To Aankhain Kaya Barsain
Jab Chaye Ga Baadil Tab Ho Gi Barsaat

Harf Likhay Thay Jitnay Woh Sab Phail Gaye
Kaaghiz K Dushman Hotay Hain Geelay Haath

Mustakbil To Mustakbil Hi Rehta Hay
Youn Lagta Hay Kabhi Nah Badlain Gay Halaat

Tha Mujh par Bhi Tang Mera Ghar is Per Bhi
Tanhai Nay Rehna Chaha Mere Saath

Main Nay To Do Chaar ilzaam Khareeday Thay
Dil K Shehar Say Tum Kaya Laaye Ho Soghaat

Saari Raat Musalsal Jagnay Walay Nay
Aankhoun Main Kuch Khwaab Sajaye Pichli Raat

Yeh Qissa Apni Tareekh Ka Hissa Hay
Kha Gaye Haathi Chand Ababeeloun Say Maat

Mangay Say Gar Milay Qateel Muhabbat Bhi
Aik Tarah Say Hoti Hay Woh Bhi Khairaat

اردو میں پڑھیں 

Jaisa Us K Liye Suna Tha Waisa Hay

Jaisa Us K Liye Suna Tha Waisa Hay
Main Barsoun Baad Usay Ab Daikha Hay

Har Manzar Ka Hota Hay Ek Pas-e-Manzir
Woh Laakhoun Main Aik Hay Lakin Tanha Hay

Main Darya Ban Jaoun Bhi To Kaya Haasil
Woh Hay Samundar Aur Sadioun Ka Payasa Hay

Gaya Tha Jab Woh Us Din Aag Bagola Tha
Waapis Aaya Hay To Barf Ka Putla Hay

Phir Maazi Ko Chooma Us K Hountoun Nay
Phir Ek Lafz Mere Kanoun Main Roya Hay

Maila Laga Hay Chaar Taraf San’natoun Ka
Kahein Kahein Koi Saaya Siski laita Hay

Kaanch Ka Har Jazba Peechay Ham Choar Aaye
Ab To Apna Pakki Umer Ka Rishta Hay

Mujh Ko Apnay Haal pah Aaye Reham Qateel
Main Nay Ek Panchi Ko Urtay Daikha Hay

اردو میں پڑھیں