Girya-e-Mussarat

~* Girya-e-Mussarat *~

Ahbaab Say Chup Chup K Bhi Roya Houn Main Aksar
Par Aaj Bhari Bazm Main
Ronay Ka Maza Aur Hi Kuch Hay

Ahbaab Ko Hairat,Kah Mere Qehqaha Bardaar Laboun Per
Kuin Lay Gayein Sabqat Meri Bheegi Huin Palkain
Mere Taptay Huay Aansoo

Shayad Mere Ahbaab Ko Maloom Nahein Hay
Izhaar-e-Mussarat Kabhi Hota Hay Jo Ro Kar
So Baar Ka Hansna Bhi Usay Choo Nahein Sakta
Aansoo Hain Woh Moti
Palkoun K Sadaf Say Jo Nikaltay Hain Usi Dam
Jab Dil K Samundar Main
Khushi Ka Koi Toofan Bapa Ho
Toofan Sama Sakta Nahein Sirf Hansi Main
Aansoo Hi Usay Apni Tarawat Main Samaitain To Samaitain
Aansoo Kah Jisaamat Main Hain Qatray Say Bhi Kuch Kam
Izhaar-e-Mussarat Main Samundar Say Baray Hain

Bay Hiss Mere Ahbaab Hain
Kaash Unko Bataye Koi Hamdam
Haasill Jo Khushi Aaj Hui Hay Mere Dil Ko
Shayad Woh Tabbasum Main Samaiti Hi Nah Jaati
Hountoun Pah Tabassum Bhi Bohat Khoob Hay lakin
Aankhoun Main Tarshah Ki Fiza Aur Hi Kuch Hay
Barsaat Main Rim Jhim Ki Sada Aur Hi Kuch Hay
Is Bazm Nain Ronay Ka Maza Aur Hi Kuch Hay

اردو میں پڑھیں

Leave a Reply

Your email address will not be published. Required fields are marked *