Category Archives: Books

All Books

Silsila Khyaloun Ka

Silsila Khyaloun Ka

Jin K Tinkay Tak Mujh Ko Pehchantay Hain
Yaad Mujhay Woh Teri Galiyaan Aaj Bhi Hain
Jin Ko Haasil Raha Sadaa Ratjaga Koi
Mere Zehan Main Woh Rang Ralliyan Aaj Bhi Hain
Aaj Bhi Main Sochoun To Aisa lagta Hay
Hont Tere Misri Ki Daliyaan Aaj Bhi Hain

Jab Main Beetay Waqt Ki Baatain Karta Houn
Kuch Murjhaye Phool Mehaknay lagtay Hain
Kahoun Tere Pas Manzar Main Jab Koi Ghazal
Bohat Puranay Jaam Khanak’nay Lagtay Hain
Ab Bhi Ginta Houn Jab Naam Raqeeboun K
Log Mujhay Hairat Say Taknay Lagtay Hain

Choomta Houn Main Un Pairoun Ko Sapnoun Main
Jin Pairoun Main Roshnioun Ki Jhanjhan Hay
Raat Ko Aksar Aankhain Dhaamp K Sota Houn
Jagmag Jagmag Youn Bhi Mera Tan Man Hay
Kaya Laina Mujh Ko in Chaand Sitaroun Say
Mere Andar To Ek Sooraj Roshan Hay

Bharkati Hay Jis Ko Yaad Jawani Ki
Dair Talak Woh Shola Sard Nahein Hota
Mosam Kaisa Bhi Ho Khoon Chehakta Hay
Umer Koi Ho Chehra Zard Nahein Hota
Yaad Nah Rakhay Jo iqraar Wafaoun K
Woh Sab Kuch Hota Hay Mard Nahein Hota

Umer K Jis Rastay Par Main Nay Paoun Dharay
Mere Jism K Saath Chala Hay Jism Tera
Pakray Raha Main Waqt Ki Ungli Jahan Talak
Pal pal Mujh Par Chaya Raha Talism Tera
Rasta Rokain Jab Halaat K Andhyaray
Roshniyan Daita Hay Mujh Ko ism Tera

اردو میں پڑھیں

Lay Gaya Apni Sab Reekh’aen Apnay Saath

Lay Gaya Apni Sab Reekh’aen Apnay Saath
Darwazay par Dastak Dainay Wala Haath

Aap Smbhal Jaye Ga Thokar Khaanay Per
Dil Ko Main Samjhaoun Meri Kaya Oqat

Yaad Nah Woh Aaye To Aankhain Kaya Barsain
Jab Chaye Ga Baadil Tab Ho Gi Barsaat

Harf Likhay Thay Jitnay Woh Sab Phail Gaye
Kaaghiz K Dushman Hotay Hain Geelay Haath

Mustakbil To Mustakbil Hi Rehta Hay
Youn Lagta Hay Kabhi Nah Badlain Gay Halaat

Tha Mujh par Bhi Tang Mera Ghar is Per Bhi
Tanhai Nay Rehna Chaha Mere Saath

Main Nay To Do Chaar ilzaam Khareeday Thay
Dil K Shehar Say Tum Kaya Laaye Ho Soghaat

Saari Raat Musalsal Jagnay Walay Nay
Aankhoun Main Kuch Khwaab Sajaye Pichli Raat

Yeh Qissa Apni Tareekh Ka Hissa Hay
Kha Gaye Haathi Chand Ababeeloun Say Maat

Mangay Say Gar Milay Qateel Muhabbat Bhi
Aik Tarah Say Hoti Hay Woh Bhi Khairaat

اردو میں پڑھیں 

Jaisa Us K Liye Suna Tha Waisa Hay

Jaisa Us K Liye Suna Tha Waisa Hay
Main Barsoun Baad Usay Ab Daikha Hay

Har Manzar Ka Hota Hay Ek Pas-e-Manzir
Woh Laakhoun Main Aik Hay Lakin Tanha Hay

Main Darya Ban Jaoun Bhi To Kaya Haasil
Woh Hay Samundar Aur Sadioun Ka Payasa Hay

Gaya Tha Jab Woh Us Din Aag Bagola Tha
Waapis Aaya Hay To Barf Ka Putla Hay

Phir Maazi Ko Chooma Us K Hountoun Nay
Phir Ek Lafz Mere Kanoun Main Roya Hay

Maila Laga Hay Chaar Taraf San’natoun Ka
Kahein Kahein Koi Saaya Siski laita Hay

Kaanch Ka Har Jazba Peechay Ham Choar Aaye
Ab To Apna Pakki Umer Ka Rishta Hay

Mujh Ko Apnay Haal pah Aaye Reham Qateel
Main Nay Ek Panchi Ko Urtay Daikha Hay

اردو میں پڑھیں

Kokh Jali

Kokh Jali
(Aasi Rizvi Marhoom Ki Mukhtasir Punjabi Nazam ka Phailao)

Gaoun Say Baahir,
Teelay Wali,Ek Darwaish Ki Qabar K Oopar
Aadhi Raat ko
Jhilmil Kapray,Jagmag Zaiwar Pehnay Huay
Woh Koun Thi Diya Jalanay Wali
Sab Kuch Hotay Janay Woh Kaya Maag Rahi Thi
Rang Rahi Thi Kuin Ujla Do Shala Apna Kaisar Main
Batar Batar Kuin Chaand Ki Jaanib Daikh Rahi Thi
Takiya Apni Chaati Per Woh Kuin Rakhti Thi
Alag Woh Pattoun Ki Ek Saij Bichati Kuin Thi
Seej Pah laiti Kohni K Bal
Apnay Aap Say Kuin Woh Baatain Karti Thi
Aur Phir Baatoun Baatoun Main
Woh Barham Kuin Ho Jati Thi
Sab Kuch Hotay Chahti Kaya Thi
Jhilmil Kaproun, Jagmag Zaiwroun Wali
Ek Darwaish Ki Qabar K oopar
Diye Jalanay Jati Kuin Thi?

اردو میں پڑھیں

Wafa Ka Bojh Hay Sir Per

Wafa Ka Bojh Hay Sir Per,Magar Uska Yeh Kehna Hay

Kah Yeh Pathar Pighal Janay Tak Usko Zinda Rehna Hay

Woh Parbat Ka Ek Aisa Pair Hay Jisnay Zamistaan Main

Badan K Dhaampnay Ko Barf  Ka Malboos Pehna Hay

Woh Ek Saaya Jo Tohfay Main Diya Tha Usko Khwaboun Nay

Wohi Ab Uska Aanchal Hay Wohhi Ab Uska Gehna Hay

Likha Tha Rait Per Ek Dossrya Ka Naam Kuin Ham Nay

Nateejay Main Jo Sadma Hay Woh Ham Dono Ko Sehna Hay

Milain Gay Sab Yahan Jhoothi Khushi Pehnay Huay Warnah

Qareeb Aa Kar Jisay Daikho, Woh Andar Say Barhana Hay

Qateel Aisi Bhi Ek Aurat Hay is Rishtoun Ki Basti Main

Kah Jo Maan Hay Nah Baiti Hay Nah Biwi Hay Nah Behna Hay

اردو میں پڑھیں

Hawaoun Ki Zubaani Sun Liya Hoga

Hawaoun Ki Zubaani Sun Liya Hoga Sitaroun Nay

Sandaisa Jo Tujhay Bhaija Tere Furqat K Maroun Nay

Woh Aankhain Jo Wazaahat K Sabhi Andaaz Rakhti Thein

Yeh Kaya Abhaam Paida Kar Diya un K ishaaroun Nay

Kaha Ek Tajrubay Nay,Daikh Yeh Hoti Hay Majboori

Galay Say Pathroun Ko Jab Lagaya Aab’sharoun Nay

Pehan’nay Ko Diya Aakhir Labadah Khush Pattoun Ka

Khizaan Ko Aik Sotaili Behan Samjha Baharoun Nay

Nazar Aaya Har Ek Tasweer Main Woh Aashnaa Chehra

Rula Daala Musawwir Ham Ko Tere Shahkaroun Nay

Khuda Jiski Zubaan Say Bolta Tha Woh Charha Sooli

Yeh Nazara Khud Apni Aankh Say Daikh Hazaroun Nay

Woh Daita Hay Qateel Aur Bay Khushamad Mujh Ko Daita Hay

Khuda Mera Nahein Daikha Tere Parwar’digaroun Nay

اردو میں پڑھیں

Muhabbat Ho Rahi Hay Taaza Dam

Muhabbat Ho Rahi Hay Taaza Dam Ahista Ahista

Barhaen Aap Bhi Aagay Qadam Ahista Ahista

Thakay Paoun Bhi Ham Tere Shabistaan K Musaafir Hain

Pohanch Hi Jayen Gay Manzil Pah Ham Aahistaa Aahistaa

Tera Milna To Kaya,Paighaam Hi Nay Kar Diya Saabit

Khushi Aaye To Mitt Jatay Hain Gham Aahistaa Aahistaa

Khud Unko Ham Nay Apnay Kaaba-e-Dil Main Basaya Tha

Ab is Kaabay Say Niklain Gay Sanam Aahistaa Aahistaa

Abhi Tou Woh Hamaray Shehr-e-Dil K Khaas Mehmaan Hain

Khulay Ga Husn Waloun Ka Bharam Aahistaa Aahistaa

Bohat Kam Aas Rakhni Chahye Shadab-e-Dil Ki

Barsata Hay Yahan Abr-e-Karam Aahistaa Aahistaa

Qateel Anjaam Hota Kaash Apna Aashiqoun Jaisa

Kah Dam Dete Kisi Zaano Pah Ham Aahistaa Aahistaa

اردو میں پڑھیں

Ghubaar Baith Gaya

Ghubaar Baith Gaya

Apnay Maazi K Naraaz Lamhaat Say

Yeh Meri Aaj Ki Guftago—-

Dil Pah Rakhi Hui Ek Garaan Bar Sill Toar Kar

Aur Bhi Kuch Mujhay Munfa’al Kar Gayi

Woh Jo Kuch Rooh Main Halkay Halkay Say Gardaab Thay

Unko Bhi Woh Mere Gham K Talaab Main Muntaqil Kar Gayi

Aur Phir itnay An Daikhay Aansoo Bahaye Meri Aankh Say

Tar Bah Tar Daaman-e-Jaan-o-Dil Kar Gayi

Lakin itna Hua

Shiddat-e-Dard Ko

Aaj Ki Guftago Moatadal Kar Gayi

اردو میں پڑھیں

Yaaro Kahan Tak Aur Muhabbat

Yaaro Kahan Tak Aur Muhabbat Nibhaoun Main

Do Mujhko Bad’dua Kah Usay Bhool Jaaoun Main

Dil To Jala Gaya Hay Woh Shola Sa Aadmi

Ab Kis Ko Choo K Haath Bhi Apna Jalaoun Main

Sunta Houn Ab Kisi Say Wafa Kar Raha Hay Woh

Ae Zindagi Khushi Say Kahein Mar Nah Jaoun Main

Ek Shab Bhi Wasal Ki Nah Mera Saath Day Saki

Ehd-e-Firaaq Aa Kah Tujhay Aazmaoun Main

Badnaam Mere Qatal Say Tanha Tou Hi Nah Ho

Laa Apni Mohar Bhi Sar-e-Mahzar Lagaoun Main

Utraa Hay Baam Say Koi ilhaam Ki Tarah

Ji Chahta Hay Sari Zameen Ko Sajaoun Main

Us Jaisa Naam Rakh K Agar Aaye Moat Bhi

Hans Kar Usay Qateel Galay Say Lagaoun Main

اردو میں پڑھیں